MP-3 форматтай шүлэг

Уг нь нэр нь Ретро л доо. Энэ шүлэг бидний гаргах голдоо хоёр биш нэг нүхтэй кассетнд багтах юм. Одоохондоо демо хувилбар нь.

Бэхэнзүрхт

Бэхийн савандаа чи зүрхийг минь даршилж хадгалаад

Бүх л амьдралынхаа турш тэр бэхээр хайрын тухай бичнэ хэмээсэн

Бэхийн савандаа чи зүрхийг минь таглаж мартаад

Бүх л амьдралынхаа турш хайр дурлал хэмээгчийг хайсан....

2010

Пегасос

Ийм хүчит аянгыг

Цавчлах туурай чинь л үүсгэжээ

Ийм сүрт далавчаараа чи

Мөрөөдлийн минь орон зайд шуурга дэгдээ

Би тэр чигээрээ мөрөөдөл юм

Цаг хугацаанаас эмээгч мөрөөдөл юм

Хөлөг баатарын тухай үлгэр бүрт уусагч

Хүүхэд хэвээрээ мөрөөдөл юм

Зэс бамбай, хүрэл дуулга минь

Зэв, мөгөөнцөрт идэгдэх энэ зууныг

Чиний авчрах галаас өөр

Өөрчлөх хүчин үгүй гэдэгт би итгэдэг

Урьтал болгох хоосон хүсэл тачаал бүрээ

Урдаа байгаа хуучин сонинг

Урж хаяад хаалга өшиглөн гарах шиг

Ухаарлаас дэндүү эрчит ойлгохуйг чи мэдрүүлээч

“Тогтож хайрла” домог минь

Дотор луу минь шагайхдаа

Доромж нүдээр харж, тавлаж

Хэнхдэгээ хага ярах өдрүүдэд минь цэг тавиач чи.

Бичихийг хүссэн...

Хэн бүхний талаар хамгийн сайхнаар төсөөлж явсан бодлыг минь

Хэмхчиж зүрхлэх түүний дотор луу шагайх завдал өгөөгүй

Онгорхой хаалга, ундуй сундуй эд юмсыг санагдуулам сэтгэлтнүүд л

Одоо надад хамгийн ойр байгаа учраас би явмаар байна

Үдэн гаргах хэн ч үгүй өртөөг зорихдоо

Өврөө тэмтэрч шүдэнз хайж мунгинахдаа

Үүргэвч л хамгийн ихээр надад зохих хэрэгсэл гэдгийг мэдэрч

Өглөө, орой, үдэш хэмээгдэгч орон зайн хэмжүүрүүдийг мартаад алхав

Гандмал шаргал өнгөөр дүрсжүүлсэн тэр дуун (цахлай)

Гадаах амьдралаас тэрс зөрүүтэйг мэдэрч

Түргэн хоолны мухлагын худалдагч эмэгтэйн

Түргэн занд нэрвэгдэж эргээд л өртөөндөө ирэв би

Явах л ёстойг минь хэлээд буй юмс бүхэн

Хүрч чадах төгсгөлийн тэндээс хэрхэн хашгирахыг минь

Харж, тааварласан учраас намайг зоригжуулж байна

Харин би үүнийг яаж ойлгож, цааш хэрхэн алхах вэ.

Өрнийн шүлэг

Өөрийгөө тойруулж тоосгоор битүү өрөх адил

Өрөө ч биш авс ч биш ганцаардалд автуулсны

Цаад учир нь чи билээ, чи билээ

Хуурамч инээмсэглэгч чи билээ

Хувилгаан чоно саранд улих

Транселваны домгууд энэ шөнө биелэнэ

Хутга болоод бууг үл ажрах

Төгс төгөлдөр бие цогцостон айсуй

Архирах дуунд нь зүрхээ дарах

Арчаагүй хүн төрхтнүүд бүгд зугт

Гагц намайг ганцаардлын тоосгон хана дунд хорьж чадсан

Галзуу удганы дараа төрөлтөн л түүнтэй тулалдана

Энгийн шүлэг

Энд хэзээ ч байгуулагдахгүй жазз бааруудыг хүлээж залхахдаа

Их олон хөгжимчин баян хуураа үүрэн их сургуулийн гудамжнаас явжээ

Эвлэгхэн кантри, этгээд блюзийг дуу хөгжмийн багш нар л санах болсноос хойш

Ихэмсэгээр смоукинг өмсөх атлаа, адгуус магтаж дуулагчид дэндүү олон болчихжээ

Дагшаа хэмнэлд халамцаж алхахыг хүссэндээ

Энэ хотоос залуус явах болно, тэдний нэг нь би

Дандаа уянгын дуу дуулдаг солгой гитарчин ах

Телевизийн “алтан фонд”-оор гарахад шүүрс алдаад

Багшийн сургууль, төмөр замын вокзал руу зөөлнөөр алхаж

“Тэндээс л хөгжим эгшиглэх ёстой гэж” хэлэн анирдана

Энд хэзээ ч байгуулагдахгүй жазз бааруудыг хүлээж залхахдаа

Энд хэзээнээс ч юм үзэгдсэн Ливерпүүлийн дөрвийн хөшөөнд мэхийн өнгөрөхдөө

90-ээд оны гранж, 70-аад оны панкийн тухай урамгүйхэн бодож

Эртний танил, домогт гитарчны хөшөөг интернетээр хараад хүчээр уйлна.