Эгэл байх шалтгаан

Өлгий сандал, савлуурын хүслэн болсон

Өнөөдрийн тухай маргааш бодож шаналагч аав нь байна аа

Ээж шигээ шонтгор хамартай ч эцэг шигээ бүлцгэр нүдтэй хүү минь

Эв дүйгүйхэн үнэг хайчлагч аавынхаа эгэл байх шалтгаан юм чи

18-ны өдөр авч амжаагүй тоглоомон цэргүүд, танк, туг

28-нд авч өгч чадах гар шиг чинь жижигхэн машины цуглуулгууд

Эгэл байх шалтгаантай аавд чинь

Ээжид чинь бий. Хүү минь

Эртний домог, туульсд шохоорхон дурлаж

Илдний сайныг барих юм чи

Эр зориг ханхалдаг манцуйгаа тайлж

“Ээж ээ дүүтэй болъе” хэмээх юм чи.

Их хотын их чимээнд зориулав...

Айзам, эгшгийн найрсал

Алгуурхнаар зүрхийг минь илбэдэг

Контра-басс дүнгэх мэт анирдан

Кофегоо үлээж, тамхиа сорном би

Их хотын хөгжим ингэж эхэлдэг

Эхлэхийг нь хүлээн би инээмсэглэдэг

Гудамжны тэртээд эмэгтэй хоолой часхийн гоцлоход

Хэдэн арван ноход уралдан боргож зөрчилдөн

Хийлийн эгшиг, гитарын ритм цохилт мэт эсрэгцэж

Хэмнэл үүсгэж өргөнө

Дэвсгэр өнгө нэхэх мэт тэр их зөрчилдөөнийг

Дэр модоо тэгнэх галт тэрэг зөөллөх ажээ.

Орвонгоороо эргэсэн мэт нам гүм эхлэхийн өмнө

Орчлонг хараагч тэр минь хашгирна

Орвонгоороо эргэсэн мэт нам гүм эхлэхэд

Орчлонг харааж ханасан тэр минь тайвширна

Чамаас олж сонссон аяз бүрээ би

Чандалж нууцлахгүй бол галзуурна гэдгээ мэдэрдэг

Чамаас олж сонссон аяз бүрээ би

Чагталж хадгалж явнам. Чамд л зориулж чагталнам...

2011.03.20 Зөөлөн-д

РОМАНС

Нөмөрт шатнаа гутлаа дэрлэн унтахуйд
Нөгөө ертөнц шатны хонгилд исгэрнэ
Алдах юмгүй амьдралыг сонгосон
Айдасгүй эрийн бие хонгио мэт хэвтэнэ
Урин цагийн үнэр анхны бороотой нэвт мэдрэгдэхэд
Унтаад сэрээгүй түүний зүрхэн тушаа сарнай дэлбээлнэ
Т.Есөн-Эрдэнэ

Твист

Гялалзах өлмий чинь өвдөгтэйгээ зөрж найгаад

Ганцхан хоромд бүсгүйн хормой үл ялиг дэрвэхэд

Алив, алив твист... гэж хэлмээр байна

Хүрэмээ тайл. Залуу минь. Цамцаа задгайл...

Сэтгэл татам айлгүйтэл, нүдээ ирмэхүй

Сэрэмж алдуулж, зүрх догдлоогоод

Хаяа энэ хөгжмийг сонсох хачин зугаатай байдаг

Хачин ихээр баясах минь хаалга, цонхыг савлуулж байна

Саксфонн эгшиглэтэл нэгэн жигд хөдлө, хөлөр

Санаанд чинь юу орж байна, надад хамаагүй

Гол нь твист, голдоо ортол твист

Гоонь эр минь, үзэсгэлэнт бүсгүй минь...

2011.03.13